Aala Hazrat Ka Ikhlaaq e Kareema In Roman

SARKAR AALA HAZRAT KA IHLAQ E KAREEMA
رضی اللہ تعالیٰ عنہ 

Janab Syed Ayyub Ali Sahab Tehreer Farmate Hain Ke Ek Kamsin Sahabzaade Nihayat Hi Be_Takallufana Andaz Mein Saadgi Ke Saath Hazir E Khidmat Huye Aur (Huzur Aala Hazrat Se) Arz Ki, Meri Buaa (Walida) Ne Tumhari Da'wat Ki Hai, Kal Subah Ko Bulaya Hai, Huzur Ne Unse Daryaaft Farmaya, Mujhe Da'wat Mein Kya Khilaiyega?
Is Par Un Sahabzaade Ne Apne Kurte Ka Daaman Jo Donon Haath Se Pakde Huye The, Phaila Diya Jismein Maash (Urad) Ki Daal Aur 2-4 Mirche Padi Huyi Thi(n), Kehne Lage Dekhiye Na Yeh Daal Laaya Hoon, Huzur Ne Unke Sar Par Dast E Shafqat Pherte Huye Farmaya, Achcha Main Aur Yeh (Haji KifayatULLAH Sahab Ki Taraf Ishaara Karte Huye) Kal 10 Baje Din (Mein) Aayenge.
Doosre Din Huzur Bahar Tashreef Laye Aur Haji Sahab Se Farmaya Chaliye, Unhone Arz Kiya, Kahan? Farmaya Un Sahabzaade Ke Yahan, Da'wat Ka Waa'da Jo Kiya Hai, Jis Waqt (Malookpur Mein Unke) Makaan Par Pahunche To Woh Sahabzaade Darwaze Par Khade Intizaar Mein The, Huzur Ko Dekhte Hi Yeh Kehte Huye, Are Maulvi Sahab Aa Gaye, Makaan Ke Andar Chale Gaye, Darwaze Mein Ek Chhappar Pada Tha Wahan Khade Hokar Huzur Intizaar Farmane Lage, Kuchh Der Ke Baa'd Ek Boseeda Chata'i Aayi Aur Daliya Mein Moti-Moti Baajre Ki Rotiyan Aur Mitti Ki Rakaab Mein Wahin Maash Ki Daal Jismein Mirchon Ke Tukde Pade Huye The, Laakar Rakhdi Aur Kehne Lage "Lo Khao",
Huzur Ne Farmaya, Bahut Achcha! Khaata Hoon, Udhar Woh Sahabzaade Paani Laane Ko Gaye Idhar Haji Sahab Ne Kaha Ke Huzur Yeh Makaan Naqqarchi Ka Hai, Yeh Sunkar Kabeeda Huye Aur Tanzan Farmaya, Abhi Kyun Kaha? Khaana Khaane Ke Baa'd Kaha Hota,
Itne Mein Woh Sahabzaade Paani Lekar Aa Gaye, Huzur Ne Daryaaft Farmaya, Aapke Walid Sahab Kahan Hain Aur Kya Kaam Karte Hain? Darwaze Ke Parde Mein Se Un Sahabzaade Ki Walida Ne Arz Kiya, Huzur Mere Shauhar Ka Intiqaal Ho Gaya, Woh Kisi Zamane Mein Naubat Bajaate The, Uske Baa'd Tauba Karli Thi, Ab Sirf Yeh Ladka Hai Jo Raj_Mazdooron Ke Saath Mazdoori Karta Hai,
Huzur Ne AlhamdulILLAH Kaha Aur Khair O Barkat Ki Dua Farmayi,
(Khaate Waqt) Dil Hi Dil Mein Haji Sahab Ke Yeh Khyaal Gasht Kar Raha Tha Ke Huzur Ko Khaane Mein Bahut Ehtiyaat Hai, Ghiza Mein Sooji Ke Biscuit Ka Isti'maal Hai, Yeh Roti Aur Woh Bhi Baajre Ki Aur Us Par Maash Ki Daal, Kis Tarah Tanavul Farmayenge?
Magar Qurban Us Ikhlaaq Aur Dildaari Ke Mezbaan Ki Khushi Ke Liye Khoob Sair Hokar Khaaya, Waapasi Mein Haji Sahab Ke Shubah Ko Rafa' Farmane Ke Liye Irshad Farmaya, Agar Aisi Khuloos Ki Da'wat Roz Ho To Main Roz Qabool Karun.

Reference
Huzur Malikul Ulma Allama Zafaruddin Bihari (Alaihir Rehmahatul Baari),
Hayaat E Aala Hazrat, Vol: 1, Pg: 165-167,
Idaara Tarweej O Isha'at, Masjid Noorul Islam, Bolton

"Raza Ka Jashne Paidaaish manate hain Wafa Waale
Raza Se Apni Ulfat Yun Batate Hain Raza Waale"

"Dare Ahmad Raza Se Jo Bhi Waabasta Hain Aie Shahid
Wahi hain Gauso Khwaja Ke Wahi Hain Mustafa Waale"